L-UE għandha servizz ċentrali ta’ kuntatt kif ukoll firxa ta’ ċentri madwar l-UE kollha li jipprovdu informazzjoni, servizzi, u appoġġ lill-pubbliku.
Sib liema huma ċ-ċentri tal-UE li jinsabu qrib tiegħek u sir af dwar is-servizzi tagħhom billi tuża l-menus li jinżlu fuq il-mappa ta’ hawn taħt. Tista’ tagħżel iċ-ċentri tal-UE
- skont il-pożizzjoni ġeografika: ikklikkja fuq il-buttuna “iġġeolokalizzani” biex tara ċ-ċentri kollha tal-UE qrib il-pożizzjoni attwali tiegħek
- skont il-pajjiż: iffiltra skont il-pajjiż u r-reġjun biex issib ċentru tal-UE
- skont iċ-ċentru: agħżel li tara ċentru wieħed jew aktar tal-UE fuq il-mappa
- skont is-suġġett: agħżel suġġett speċifiku biex issib l-aktar ċentru/i tal-UE adattat(i) biex ikollok tweġiba għall-mistoqsija tiegħek.
Ikklikkja fuq wieħed miċ-ċentri tal-UE fuq il-mappa (immarkati b’tikek ikkuluriti) għad-dettalji dwar kif tista’ tagħmel kuntatt u għal aktar informazzjoni dwar is-servizzi li joffri.
Il-mappa tal-“Unjoni Ewropea madwari”
Skopri liema ċentru jista’ jkunlek utli
Xi ċentri tal-UE jipprovdu informazzjoni ġenerali dwar l-UE, u oħrajn joffru pariri u servizzi speċjalizzati dwar programmi u temi differenti tal-UE. Skopri liema ċentru huwa l-aktar adattat biex iwieġeb il-mistoqsija tiegħek billi tagħti daqqa t’għajn lejn il-kategoriji ta’ hawn taħt.
Informazzjoni ġenerali dwar l-UE
Iċ-ċentri tal-EUROPE DIRECT iqarrbu lill-Unjoni Ewropea lejn in-nies fil-post fejn jgħixu. Dawn iċ-ċentri huma f’pożizzjoni li jwieġbu l-mistoqsijiet tiegħek dwar l-UE. Jiddjalogaw maċ-ċittadini u mal-partijiet ikkonċernati sabiex iħossuhom aktar involuti fil-proġett Ewropew.
Pariri u appoġġ dwar fondi, politiki, u programmi speċifiċi tal-UE
- Id-Desks tal-Ewropa Kreattiva jgħinu lis-setturi awdjoviżivi, kulturali, u kreattivi Ewropej biex jaċċessaw il-finanzjament.
- Il-punti ta’ kuntatt lokali tal-Erasmus għal Imprendituri Żgħażagħ jipprovdu informazzjoni u għajnuna lill-imprendituri li huma interessati jieħdu sehem f’dan il-programm ta’ skambju transfruntier għall-impriżi.
- Iċ-Ċentri Ewropej ta’ Dokumentazzjoni jappoġġjaw l-edukazzjoni u r-riċerka dwar l-integrazzjoni fl-UE. Dawn jipprovdu għażla ta’ dokumenti dwar l-affarijiet Ewropej u jinkoraġġixxu lill-komunità akkademika biex tinvolvi ruħha fil-qagħda attwali fl-UE u fid-dibattitu dwar il-futur tal-UE.
- In-Network Ewropew dwar il-Migrazzjoni jlaqqa’ flimkien esperti dwar il-migrazzjoni u l-ażil li jipprovdu informazzjoni u għarfien oġġettivi, komparabbli, u rilevanti għall-politika dwar kwistjonijiet emerġenti relatati mal-ażil u l-migrazzjoni fl-Ewropa.
- Il-Punti ta’ Kuntatt Nazzjonali għaċ-Ċittadini, l-Ugwaljanza, id-Drittijiet u l-Valuri jipprovdu appoġġ u gwida dwar il-programm il-ġdid dwar iċ-Ċittadini, l-Ugwaljanza, id-Drittijiet u l-Valuri.
- Il-Punti ta’ Kuntatt Nazzjonali għall-Inizjattivi taċ-Ċittadini Ewropej jipprovdu informazzjoni u assistenza lill-organizzaturi (potenzjali) tal-Inizjattivi taċ-Ċittadini Ewropej. Is-servizz joffruh mingħajr ħlas.
- Il-Punti ta’ Kuntatt Nazzjonali għal Orizzont Ewropa joffru gwida, informazzjoni prattika, u assistenza dwar il-programm Orizzont Ewropa għar-riċerka u l-innovazzjoni.
- Il-Punti Fokali Nazzjonali jipprovdu pariri u appoġġ lil entitajiet lokali mid-diversi pajjiżi li jieħdu sehem fil-Programm l-UE għas-Saħħa.
Gwida, għajnuna, u medjazzjoni għall-konsumaturi u għan-negozji
- In-Network Enterprise Europe jipprovdi servizzi bla ħlas li jgħinu lin-negozji jinnovaw u jikbru fuq skala internazzjonali. Huwa l-akbar network fid-dinja li joffri appoġġ għall-impriżi żgħar u ta’ daqs medju li għandhom ambizzjonijiet internazzjonali.
- In-Network taċ-Ċentri Ewropej tal-Konsumaturi jispjega d-drittijiet tal-konsumatur u jista’ jgħin biex jissolva t-tilwim mal-bejjiegħa bbażati f’pajjiż ieħor tal-UE.
- In-Netwerk għas-Soluzzjoni tat-Tilwim Finanzjarju jgħin lill-konsumaturi jaslu għal soluzzjoni barra mill-qorti dwar ilmenti fil-qasam tas-servizzi finanzjarji.
- In-network SOLVIT jgħin liċ-ċittadini u n-negozji tal-UE jinfurzaw id-drittijiet tagħhom meta jgħixu, jaħdmu, jew joperaw f’pajjiż ieħor tal-UE.
L-iżvilupp tal-karriera, il-mobbiltà transfruntiera tal-ħaddiema u tal-istudenti
- L-Aġenziji Nazzjonali tal-Erasmus+ jipprovdu informazzjoni u appoġġ dwar il-programm Erasmus+.
- Il-Euraxess jappoġġja l-mobbiltà u l-iżvilupp tal-karriera tar-riċerkaturi.
- Il-EURES huwa network Ewropew ta’ kooperazzjoni tas-servizzi tal-impjiegi, imfassal biex jiffaċilita l-moviment liberu tal-ħaddiema.
- Il-Eurodesk jara li ż-żgħażagħ ikunu jafu dwar x’opportunitajiet Ewropej hemm għalihom.
- In-network Euroguidance jippromwovi l-iżvilupp tal-kompetenzi u l-mobbiltà internazzjonali għat-tagħlim.
- Iċ-Ċentri Nazzjonali ta’ Informazzjoni dwar ir-Rikonoxximent Akkademiku fl-Unjoni Ewropea jassistu liċ-ċittadini fil-proċess tar-rikonoxximent tad-diplomi u perjodi ta’ studju li jkunu għamlu f’pajjiżi oħrajn.
- Iċ-Ċentri Nazzjonali tal-Europass huma l-ewwel punt ta’ kuntatt għal kwalunkwe persuna jew organizzazzjoni li jkunu interessati li jużaw jew jitgħallmu aktar dwar il-Europass, l-għodda Ewropea għall-ġestjoni tat-tagħlim u l-karriera.
Din il-paġna ġiet aġġornata l-aħħar: 6 Frar 2026