An Comhghnóthas um Eoraip Chiorclach Bhithbhunaithe (CBC JU)

Forléargas

• Ról: tionscadail taighde agus nuálaíochta a mhaoiniú lena gcuirtear tionscail bhithbhunaithe iomaíocha, inbhuanaithe agus chiorclacha chun cinn san Eoraip
• Stiúrthóir Feidhmiúcháin: Nicoló Giacomuzzi-Moore
• Comhaltaí nó páirtithe: An tAontas Eorpach (arna ionadú ag an gCoimisiún Eorpach) agus Cuibhreannas na dTionscal Bithbhunaithe
• Bliain a bhunaithe: 2021
• An líon foirne: 29
• Suíomh: An Bhruiséil (an Bheilg)
• Suíomh Gréasáin: An Comhghnóthas um Eoraip Bhithbhunaithe Chiorclach

Is comhpháirtíocht phoiblí phríobháideach €2 bhilliún é an Comhghnóthas um Eoraip Chiorclach Bhithbhunaithe (Comhghnóthas CBE) idir an tAontas Eorpach agus Cuibhreannas na dTionscal Bithbhunaithe (BIC).

Gníomhaíochtaí

Seo a leanas príomhchuspóirí an Chomhghnóthais um Eoraip Chiorclach Bhithbhunaithe:

• dlús a chur le próiseas na nuálaíochta, réitigh bhithbhunaithe nuálacha a fhorbairt
• dlús a chur le húsáid réiteach bithbhunaithe aibí agus nuálach sa mhargadh
• ardleibhéal feidhmíochta comhshaoil a chinntiú maidir le córais thionsclaíocha bhithbhunaithe.

Go nithiúil, tá tionscadail ar fud na hEorpa á maoiniú ag an gcomhpháirtíocht arb é is aidhm dóibh:

• tacú le taighde agus nuálaíocht i réitigh bhithbhunaithe inbhuanaithe
• laghdú a dhéanamh ar na rioscaí a bhaineann le hinfheistíocht i ngléasraí táirgthe ciorclacha bithbhunaithe
• aghaidh a thabhairt ar na dúshláin theicneolaíocha, rialála agus mhargaidh atá roimh an mbithgheilleagar
• comhar a neartú idir na grúpaí uile in earnáil an bhithgheilleagair
• teagmháil a dhéanamh le níos mó páirtithe leasmhara feadh na slabhraí luacha.

Faigh amach faoi na tionscadail atá á gcistiú ag Comhghnóthas CBE

Féach leat an méid atá bainte amach ag na tionscadail sin

Tuilleadh eolais faoi dheiseanna maoinithe Chomhghnóthas CBE

Cé a bhaineann tairbhe as?

Tá sé ríthábhachtach don Aontas aistriú ó amhábhair iontaise agus mianraí neamh-inathnuaite chun a neamhspleáchas acmhainní a neartú, chun tacú le fás eacnamaíoch inbhuanaithe agus chun a spriocanna uaillmhianacha aeráide a bhaint amach. Tá sé mar aidhm ag Comhghnóthas CBE é sin a dhéanamh trí phróisis táirgthe chiorclacha an-nuálach a úsáid bunaithe ar amhábhair in-athnuaite, cuir i gcás plandaí, agus dramhaíl orgánach thionsclaíoch ó tháirgeadh talmhaíochta, muirí agus foraoiseachta.

Tionscail láidre bhithbhunaithe atá tíosach ar acmhainní agus iomaíoch, is gníomhaithe tábhachtacha iad i ndáil leis sin. Trí tháirgí agus ábhair in-athnuaite ó dhramhaíl agus ó bhithmhais a tháirgeadh ar bhealach nuálach, inbhuanaithe agus ciorclach, is féidir leo poist a chruthú, foinsí ioncaim malartacha a thairiscint do tháirgeoirí príomhúla agus borradh a chur faoi gheilleagair áitiúla ar fud na hEorpa agus rannchuidiú go suntasach leis an aeráidneodracht ag an am céanna.

Is é ról an Chomhghnóthais CBE grúpaí éagsúla a thabhairt le chéile ó thionscail bhithbhunaithe, ó fheirmeoirí go heolaithe agus tionscail mhóra, chun na dúshláin teicneolaíochta, rialála agus mhargaidh atá roimh an earnáil a réiteach. Cuireann a scéim cistiúcháin phríobháideach phoiblí borradh faoin nuálaíocht agus faoin gcur in úsáid ar an margadh agus réitíonn sé an bealach don infheistíocht amach anseo.