Aġenzija Ewropea għall-Gwardja tal-Fruntiera u tal-Kosta (Frontex)

Ħarsa ġenerali

• Rwol: Il-Frontex, l-Aġenzija Ewropea għall-Gwardja tal-Fruntiera u tal-Kosta, tappoġġja lill-pajjiżi tal-UE u ta’ Schengen jimmaniġġjaw il-fruntieri esterni tal-UE u jiġġieldu kontra l-kriminalità transfruntiera.

  Il-Frontex hija ċentru ta’ eċċellenza għall-attivitajiet ta’ kontroll tal-fruntieri fil-fruntieri esterni tal-UE, il-kondiviżjoni tal-intelligence u l-għarfien espert mal-pajjiżi kollha tal-UE, kif ukoll mal-pajjiżi ġirien mhux tal-UE affettwati minn xejriet migratorji u kriminalità transfruntiera.

• Direttur: Hans Leijtens
• Stabbilita fi: 2004
• Numru ta’ staff: aktar minn 2,100 (Marzu 2023)
• Baġit: €845.4 miljun (2023)
• Post: Varsavja (il-Polonja)
• Sit web: Frontex

X’tagħmel

Il-Frontex tappoġġja lill-UE u l-pajjiżi ta’ Schengen fl-aspetti kollha relatati mal-immaniġġjar tal-fruntieri, mill-appoġġ fuq il-post u l-ġlieda kontra l-kriminalità transfruntiera, is-sorveljanza mill-ajru u l-ġbir ta’ informazzjoni, biex tgħin fil-proċeduri ta’ ritorn, tidentifika teknoloġiji ġodda u ħafna oħrajn. 

Bil-korp permanenti, l-ewwel servizz uniformi tal-infurzar tal-liġi tal-Unjoni Ewropea, il-Frontex ittrasformat f’fergħa operazzjonali tal-UE. Mijiet ta’ uffiċjali qed jieħdu sehem f’operazzjonijiet fil-fruntieri esterni tal-Unjoni Ewropea u lil hinn minnha. 

Illum, il-Frontex tipprovdi s-sigurtà u tiżgura fruntieri esterni sikuri u li jiffunzjonaw tajjeb. Hija l-akbar aġenzija tal-UE u l-aktar waħda li qed tikber b’rata mgħaġġla.

Il-mandat tal-Frontex huwa stabbilit fil-bażi ġuridika tagħha.

Min jibbenefika

Il-Frontex tinsab hemm għall-pajjiżi u l-ġirien Ewropej li jeħtieġu appoġġ biex jagħmlu ż-żona Schengen tal-UE aktar sikura u sigura.

B’aktar minn 2,000 uffiċjal tal-korp permanenti u staff li jaħdmu fil-fruntieri esterni tal-UE, karozzi, ajruplani u dgħajjes tal-għassa li jappoġġjaw lill-awtoritajiet nazzjonali bil-kontroll tal-fruntieri u l-ġlieda kontra l-kriminalità, il-Frontex saret korp operazzjonali veru tal-Unjoni Ewropea. 

L-operazzjonijiet tagħna jkopru l-Unjoni Ewropea, mill-fruntieri tal-Lvant tal-UE, il-Balkani tal-Punent, sal-Greċja u Ċipru. L-Aġenzija hija attiva barra mill-UE b’operazzjonijiet fil-Moldova, is-Serbja, il-Montenegro u l-Albanija.

B’mijiet ta’ miljuni ta’ vjaġġaturi li jidħlu fiż-żona Schengen kull sena, waħda mill-akbar sfidi għall-awtoritajiet tal-fruntieri hija li jidentifikaw malajr kwalunkwe attività kriminali mingħajr ma jikkawżaw dewmien għall-passiġġieri. Il-Frontex, flimkien ma’ istituzzjonijiet oħra tal-UE u 30 pajjiż Ewropew, qed timplimenta l-ETIAS – sistema ta’ awtorizzazzjoni għall-ivvjaġġar għal ċittadini mingħajr viża – li tkompli ssaħħaħ is-sigurtà interna tal-UE filwaqt li tiżgura qsim bla xkiel tal-fruntieri tal-vjaġġaturi.