Bratach an Aontais | an tAontas Eorpach

Siombalachas

Tá bratach na hEorpa anois ar cheann de na siombailí is aitheanta san Eoraip agus ar fud an domhain. Is siombail í den Aontas Eorpach féin agus, ar bhonn níos leithne, d’fhéiniúlacht agus d’aontacht na hEorpa. Tá i bhfad níos mó i gceist léi ná suaitheantas institiúideach. Seasann sé do luachanna agus féiniúlacht chomhroinnte na milliún Eorpach atá aontaithe ina n-éagsúlacht.

Ciorcal de 12 réalta ar dhath an óir agus cúlra gorm a léirítear uirthi. Is siombail iad d’idéil na haontachta, na dlúthpháirtíochta agus na síochána i measc mhuintir na hEorpa.

Níl aon bhaint ag an líon réalta leis an líon Ballstát, ach is siombail é an ciorcal den aontacht.

Stair

Téann stair na brataí siar go 1955, nuair a roghnaigh Comhairle na hEorpa, eagraíocht idirnáisiúnta um chearta an duine, an dearadh reatha lena úsáid di féin. Tríocha bliain ina dhiaidh sin, ghlac na hinstitiúidí Eorpacha an bhratach chéanna.

Nollaig 1955
Ghlac Comhairle na hEorpa, eagraíocht idirnáisiúnta um chearta an duine atá éagsúil ón Aontas Eorpach, an bhratach mar shuaitheantas oifigiúil di féin.
Aibreán 1983
Mhol Parlaimint na hEorpa an bhratach a ghlacadh le haghaidh na gComhphobal Eorpach, as a n-eascródh an tAontas Eorpach ina dhiaidh sin.
Meitheamh 1985
Ghlac ceannairí an Aontais Eorpaigh an bhratach mar shuaitheantas oifigiúil na gComhphobal Eorpach, as a n-eascródh an tAontas Eorpach ina dhiaidh sin.
Bealtaine 1986
Ardaíodh bratach na hEorpa den chéad uair lasmuigh d’fhoirgneamh an Berlaymont, ceanncheathrú an Choimisiúin Eorpaigh sa Bhruiséil.
Eanáir 2002
Cuireadh an euro i gcúrsaíocht mar nótaí bainc agus boinn i 12 cheann de thíortha an Aontais. Cuireadh an bhratach ar nótaí bainc euro mar shiombail den fhéiniúlacht Eorpach.
Samhain 2015
Eisíodh bonn comórtha euro chun 30 bliain a chomóradh ó ghlac an tAontas an bhratach. Is é Georgios Stamatopoulos, greanadóir ag Banc na Gréige, a chruthaigh a dhearadh. Is éard atá ann 12 réalta a chlaochlaíonn ina bhfíoracha daonna, rud atá ina shiombail den Eoraip nua a bhí ag teacht chun cinn. Féach ar an dearadh buaiteach.
Meitheamh 2025
Rinneamar ceiliúradh 40 bliain ó ghlac an tAontas an bhratach mar a shuaitheantas oifigiúil. Tá bratach na hEorpa ina siombail anois d’ardmhianta na milliún Eorpach le haghaidh mór-roinn atá aontaithe sa tsíocháin, sa rathúnas agus sa mheas ar dhínit an duine.

Na háiteanna a bhfeictear an bhratach

I do shaol laethúil, bíonn an bhratach le feiceáil in go leor áiteanna: 

os comhair hallaí baile, foirgnimh rialtais, institiúidí, comhlachtaí agus gníomhaireachtaí an Aontais, ollscoileanna, ionadaíochtaí taidhleoireachta agus i gcearnóga poiblí
ar cheann den iliomad tionscadal agus tionscnamh a dtacaíonn an tAontas leo, nó ar chuir an tAontas cabhair ar fáil dóibh in am an ghátair nó i gcás tubaiste, i dtíortha den Aontas agus ar fud an domhain
ar do phas agus ar na nótaí euro i do sparán
ag comórtais idirnáisiúnta spóirt, cuir i gcás Corn Laver na leadóige, Corn Ryder an ghailf, Sraith Seaimpíní UEFA
lasmuigh den Aontas Eorpach, áit a gcrochann go leor daoine é ar son a bhfuil i gceist leis. Ón Úcráin in 2014 go dtí an tSeoirsia in 2024, tá an bhratach in airde go cróga ag go leor daoine, iad ag iarraidh a náisiúin a thabhairt níos gaire don tionscadal Eorpach.