L-Istitut Ewropew għall-Ugwaljanza bejn is-Sessi (EIGE)

Ħarsa ġenerali

• Rwol: jipproduċi riċerka indipendenti u jikkondividi l-aħjar prattika biex jippromwovi l-ugwaljanza bejn il-ġeneri u jelimina d-diskriminazzjoni bbażata fuq il-ġeneru
• Direttur: Carlien Scheele
• Stabbilit: 2010
• Staff: 50
• Post: Vilnius (il-Litwanja)
• Sit web: Istitut Ewropew għall-Ugwaljanza bejn is-Sessi

X’jagħmel

Bħala l-aġenzija għall-ugwaljanza bejn il-ġeneri fl-Unjoni Ewropea aħna:

• Nipprovdu riċerka, niġbru u nanalizzaw data dwar l-ugwaljanza bejn il-ġeneri b’perspettiva intersezzjonali
• Niżviluppaw metodi biex intejbu l-istatistika dwar il-ġeneri u l-ġbir tad-data
• Nikkomunikaw id-data u l-informazzjoni komparabbli u affidabbli tagħna b’approċċ ibbażat fuq it-tama
• Inkejlu l-istat tal-ugwaljanza bejn il-ġeneri kemm fil-livell tal-UE kif ukoll f’dak tal-Istati Membri
• Niżviluppaw għodod metodoloġiċi u nipprovdu appoġġ tekniku għall-integrazzjoni tal-perspettiva tal-ġeneri fil-politiki kollha tal-UE u nazzjonali
• Nikkooperaw mal-istituzzjonijiet tal-UE; l-Istati Membri; l-organizzazzjonijiet internazzjonali; l-NGOs; l-organizzazzjonijiet ta’ opportunitajiet indaqs; l-universitajiet u l-esperti; iċ-ċentri ta’ riċerka; is-sħab soċjali u l-korpi relatati; il-media u l-aġenziji assoċjati tal-UE tagħna
   

Il-prodotti tal-EIGE jinkludu dawn li ġejjin:

• Indiċi tal-Ugwaljanza bejn il-Ġeneri: juri x-xejriet tal-ugwaljanza bejn il-ġeneri kull sena
• Pjattaforma għall-integrazzjoni tal-perspettiva tal-ġeneri: torbot l-ugwaljanza bejn il-ġeneri ma’ oqsma differenti tas-soċjetà
• Bażi tad-Data tal-Istatistika skont il-Ġeneru: tagħti l-fatti u ċ-ċifri skont il-ġeneru
• Glossarju u Teżawru: jispjegaw il-kunċetti tal-ugwaljanza bejn is-sessi

Min jibbenefika

Bħala ċ-ċentru tal-għarfien Ewropew dwar l-ugwaljanza bejn il-ġeneri, l-EIGE:

• Jgħin lill-istituzzjonijiet tal-UE u lill-Istati Membri tal-UE biex jieħdu deċiżjonijiet infurmati u msejsa fuq l-evidenza li jqisu l-perspettiva tal-ugwaljanza bejn il-ġeneri.
• Jiċċentralizza l-informazzjoni dwar l-ugwaljanza bejn il-ġeneri għall-benefiċċju ta’ organizzazzjonijiet tas-soċjetà ċivili, l-akkademja, organizzazzjonijiet internazzjonali u s-sħab soċjali.
• Jipprovdi ispirazzjoni għal kull min hu interessat fl-ugwaljanza bejn il-ġeneri.

Aktar Informazzjoni

Aħbarijiet u avvenimenti tal-EIGE

Impjiegi fl-EIGE