L-Aġenzija Ewropea għad-Difiża (EDA)

Ħarsa ġenerali

• X’inhu r-rwol tagħha: l-aġenzija tappoġġja proġetti Ewropej ta’ kooperazzjoni fil-qasam tad-difiża u tipprovdi forum għall-ministeri Ewropej tad-difiża.
• Min hu l-Kap Eżekuttiv: Jiří Šedivý
• Min huma l-membri: is-27 Stat Membru tal-UE 
• Meta twaqqfet: fl-2004
• Kemm għandha persunal: 180
• Fejn hija bbażata: Brussell (il-Belġju)
• Is-sit elettroniku tagħha: EDA

L-Aġenzija Ewropea għad-Difiża (EDA) ġiet stabbilita fl-2004 u tgħin lis-27 Stat Membru tagħha (il-pajjiżi kollha tal-UE) biex jiżviluppaw ir-riżorsi militari tagħhom.

Tippromwovi l-kollaborazzjoni, tniedi inizjattivi ġodda, u tintroduċi soluzzjonijiet biex jitjiebu l-kapaċitajiet tad-difiża. Tgħin ukoll lill-Istati Membri biex jiżviluppaw kapaċitajiet ta’ difiża konġunta jekk ikunu jixtiequ jagħmlu hekk.

L-EDA hi faċilitatur ewlieni fl-iżvilupp tal-kapaċitajiet li fuqhom hija msejsa l-Politika ta’ Sigurtà u Difiża Komuni (PSDK) tal-UE.

L-aġenzija hi bbażata fi Brussell u timpjega madwar 180 ruħ. Bħala kap għandha lir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà u Viċi President tal-Kummissjoni Ewropea.

X’tagħmel l-aġenzija

L-EDA tappoġġja lis-27 Stat Membru tagħha – il-pajjiżi kollha tal-UE – fit-titjib tal-kapaċitajiet ta’ difiża tagħhom permezz tal-kooperazzjoni Ewropea.

Taġixxi bħala faċilitatur u tippermetti l-aċċess għall-ministeri tad-difiża li lesti jaħdmu fuq proġetti kollaborattivi dwar il-kapaċità tad-difiża.

L-aġenzija hi ċentru ta’ koperazzjoni tad-difiża Ewropea. L-għarfien espert u n-networks tagħha jippermettulha tkopri spettru wiesa’ fil-qasam tad-difiża, inklużi:

• l-armonizzazzjoni tar-rekwiżiti biex jinkisbu kapaċitajiet operattivi
• ir-riċerka u l-innovazzjoni għall-iżvilupp ta’ dimostraturi tat-teknoloġija
• it-taħriġ u l-eżerċizzji ta’ manutenzjoni li jappoġġjaw l-operazzjonijiet tal-Politika ta’ Sigurtà u ta’ Difiża Komuni.

L-EDA taħdem ukoll biex tissaħħaħ l-industrija tad-difiża Ewropea u taġixxi bħala faċilitatur u intermedjarju bejn il-partijiet ikkonċernati militari tal-Istati Membri u l-politiki tal-UE li għandhom impatt fuq id-difiża.

F’Mejju 2017, l-Istati Membri qablu li jsaħħu l-missjoni tal-aġenzija, inkluż billi jagħmluha l-operatur ċentrali għall-attivitajiet relatati mad-difiża ffinanzjati mill-UE.

Min jibbenefika

L-Istati Membri tal-UE (UE-27) jibbenefikaw mill-mod flessibbli kif taħdem l-aġenzija li jippermettilhom jiddeċiedu dwar il-parteċipazzjoni tagħhom skont il-ħtiġijiet tad-difiża nazzjonali tagħhom.

L-EDA tgħin lill-ministeri Ewropej tad-difiża jindirizzaw in-nuqqasijiet tal-kapaċità u tat-taħriġ fil-qasam tad-difiża .

L-EDA għandha ftehimiet ma’ xi pajjiżi li mhumiex fl-UE (in-Norveġja, is-Serbja, l-Iżvizzera, u l-Ukrajna). Għandha wkoll Arranġament Amministrattiv mad-Dipartiment tad-Difiża tal-Istati Uniti li jipprevedi kooperazzjoni transatlantika aktar b’saħħitha fid-difiża f’oqsma speċifiċi, inkluż fl-iskambju ta’ informazzjoni.