Is-Servizz Ewropew għall-Azzjoni Esterna (SEAE)

Ħarsa ġenerali

• Rwol: Jimmaniġġja r-relazzjonijiet diplomatiċi tal-UE ma’ pajjiżi oħra barra l-blokk u jmexxi l-politika estera u ta’ sigurtà tal-UE
• Ir-Rappreżentant Għoli għall-Affarijiet Barranin u l-Politika ta’ Sigurtà: Kaja Kallas 
• Stabbilit fi: 2011
• Post: Brussell (il-Belġju)
• Sit web: Is-Servizz Ewropew għall-Azzjoni Esterna

Is-Servizz Ewropew għall-Azzjoni Esterna (SEAE) hu s-servizz diplomatiku tal-UE. Għandu l-għan li jagħmel il-politika estera tal-UE aktar koerenti u effettiva, u b’hekk tiżdied l-influwenza globali tal-Ewropa.

X’jagħmel is-SEAE?

• jappoġġja lir-Rappreżentant Għoli tal-UE fit-tmexxija tal-politika estera u ta’ sigurtà tal-UE
• jimmaniġġja r-relazzjonijiet diplomatiċi u s-sħubijiet strateġiċi ma’ pajjiżi mhux tal-UE
• jaħdem mas-servizzi diplomatiċi nazzjonali tal-pajjiżi tal-UE, in-NU u setgħat prinċipali oħrajn

Eżempji prattiċi jinkludu:

• il-bini tal-paċi – b’appoġġ politiku, ekonomiku u prattiku
• l-iżgurar tas-sigurtà – skont il-Politika ta’ Sigurtà u ta’ Difiża Komuni
• iż-żamma ta’ relazzjonijiet tajbin mal-ġirien immedjati tal-UE permezz tal-Politika Ewropea tal-Viċinat
• l-għajnuna għall-iżvilupp u l-għajnuna umanitarja u r-rispons għall-kriżijiet
• l-indirizzar tal-kwistjonijiet tat-tibdil fil-klima u tad-drittijiet tal-bniedem

Kompożizzjoni

Is-Servizz Ewropew għall-Azzjoni Esterna jitmexxa mill-kap tal-affarijiet barranin tal-UE – jew mir-Rappreżentant Għoli għall-Affarijiet Barranin u l-Politika ta’ Sigurtà. Huwa magħmul minn:

• fi Brussell – staff espert trasferit mill-Kunsill tal-UE, mill-Kummissjoni Ewropea u mis-servizzi diplomatiċi tal-pajjiżi tal-UE
• fid-dinja – network ta’ “ambaxxati” tal-UE (delegazzjonijiet)

Kif jaħdem is-SEAE?

Ir-Rappreżentant Għoli huwa wkoll il-Viċi President tal-Kummissjoni Ewropea. Jirrappreżenta l-politika estera u ta’ sigurtà tal-UE fid-dinja, jikkoordina x-xogħol tal-Kummissjoni Ewropea dwar ir-relazzjonijiet esterni tal-UE u jippresjedi l-laqgħat tal-ministri għall-Affarijiet Barranin, id-Difiża u l-Iżvilupp tal-UE. Ir-Rappreżentant Għoli/il-Viċi President jimplementa l-politika estera u ta’ sigurtà tal-UE, flimkien mal-pajjiżi tal-UE u bl-użu ta’ riżorsi nazzjonali u tal-UE. B’dan il-mod biex tiġi żgurata l-konsistenza fil-politika estera fl-Ewropa kollha.

Lil hinn mill-fruntieri tagħha, l-Unjoni Ewropea hi rappreżentata minn għadd ta’ uffiċċji fil-pajjiżi – id-delegazzjonijiet tal-UE – li għandhom rwol simili għal dak ta’ ambaxxata.

Is-SEAE u int

Il-politiki u l-programmi tal-affarijiet barranin tal-UE jgħinu biex jipproteġuk – bħala ċittadin tal-UE – lil hinn mill-fruntieri tal-UE u jistgħu jipprovdu wkoll edukazzjoni u opportunitajiet ta’ karriera.

Biex tinteraġixxi mas-SEAE, tista’:

• tagħmel petizzjoni dwar kwistjonijiet ta’ politika estera
• tieħu sehem f’konsultazzjonijiet pubbliċi dwar il-politika estera
• tibgħat email bil-mistoqsijiet dwar is-SEAE

Aktar informazzjoni

Rapporti annwali tal-attività tas-SEAE