Bhí Ylva Anna Maria Lindh gníomhach i saol na polaitíochta ó aimsir a hóige anall, agus bhí sí ar dhuine de laochra na polaitíochta comhaimseartha lena linn sa tSualainn. Rugadh í in 1957, chuaigh sí le léann an dlí in Ollscoil Uppsala, agus sa bhliain 1982 d’éirigh léi suíochán a fháil sa Pharlaimint. 12 bhliain dar gcionn is ea a fuair sí a céad phost sa chomhaireacht, agus is ina hAire Comhshaoil a ceapadh í.
Saol agus beatha
In 1998, ceapadh Lindh ina hAire Gnóthaí Eachtracha i gcomhaireacht an Phríomh-Aire Göran Persson. Bhí sé de cháil uirthi gurbh é an modh díreach a chleachtadh sí ina cuid cainte, agus is neamhbhalbh a labhraíodh sí i leith chearta an duine thar aon ní.
- I Moscó di, is trom a cháin sí gníomhaíochtaí na Rúiseach i Seisnia.
- Ba dhaingean an crann taca í do réiteach an dá stát ar an gcoimhlint idir Iosrael agus an Phalaistín, agus is fíochmhar a chuir sí in aghaidh an bheartais a bhí ag an bPríomh-Aire Ariel Sharon i leith na bPalaistíneach ag an am.
- Sheas sí go freasúrach in aghaidh an ionraidh a rinneadh ar an Iaráic in 2003 ar an ábhar nach raibh sé faofa ag na Náisiúin Aontaithe.
- I Washington di, thug sí íde béil do na Stáit Aontaithe faoin gcaoi ar caitheadh leis na príosúnaigh i mBá Guantanamo.
Fís don Eoraip
Is mór a bhí lámh ag Lindh i bhforbairt na Sualainne i láthair an Aontais Eorpaigh ós í ba chathaoirleach ar chruinnithe na n-airí gnóthaí eachtracha le linn uachtaránacht na Sualainne in 2001. In 2001, ba í Lindh príomhthoscaire na hEorpa nuair a bhí coimhlint á tuar i bPoblacht iar-Iúgslavach na Macadóine (tír darb ainm an Mhacadóin Thuaidh feasta), agus ainneoin beartas eachtrach an Aontais ina snáitheanna gan fí mar ba ghnách, d’éirigh léi-sean iad a tharraingt le chéile ionas gur múchadh an choimhlint.
Foilseacháin
Tuilleadh eolais faoi shaol agus obair Anna Lindh agus an méid a chuir sí le tionscadal na hEorpa