L-ewro huwa l-aktar prova tanġibbli tal-integrazzjoni Ewropea: madwar 341 miljun ruħ jużaw din il-munita kuljum, u dan jagħmilha t-tieni munita l-aktar użata fid-dinja. Kull min jivvjaġġa jew jixtri online minn fuq siti web ibbażati f’pajjiż ieħor tal-UE mill-ewwel jinduna bil-benefiċċji tal-munita komuni.
Pajjiżi membri li jużaw l-ewro
Bħalissa, l-ewro (€) huwa l-munita uffiċjali ta’ 20 minn 27 pajjiż membru tal-UE li flimkien jiffurmaw dik li hi uffiċjalment magħrufa bħala ż-żona tal-ewro.
Għalkemm il-pajjiżi kollha tal-UE huma parti mill-Unjoni Ekonomika u Monetarja (UEM), 20 minnhom issostitwew il-muniti nazzjonali tagħhom bil-munita unika, l-ewro. Dawn il-pajjiżi tal-UE jiffurmaw iż-żona tal-ewro.
Il-pajjiżi li ġejjin għadhom m’adottawx l-ewro, iżda se jissieħbu fiż-żona tal-ewro ladarba jissodisfaw il-kundizzjonijiet meħtieġa. Il-maġġoranza tagħhom huma pajjiżi li ssieħbu fl-Unjoni fl-2004, fl-2007 u fl-2013, wara l-introduzzjoni tal-ewro fl-2002.
Xi drabi, l-Istati Membri jkunu jistgħu jinnegozjaw in-nonparteċipazzjoni tagħhom fi kwalunkwe leġiżlazzjoni jew trattat tal-Unjoni Ewropea, u jaqblu li ma jipparteċipawx f’ċerti oqsma ta’ politika. Fir-rigward tal-munita unika, nistgħu nieħdu lid-Danimarka bħala eżempju, peress li żammet il-munita tagħha wara li saret membru tal-UE.
Kif jissieħbu l-pajjiżi
Sabiex jissieħbu fiż-żona tal-ewro, l-Istati Membri tal-UE huma meħtieġa jissodisfaw l-hekk imsejħa “kriterji ta’ konverġenza”.
Dawn il-kundizzjonijiet ekonomiċi u legali, li għandhom jiġu ssodisfati, ġew stabbiliti fit-Trattat ta’ Maastricht fl-1992 u huma magħrufa wkoll bħala l-“kriterji ta’ Maastricht”. L-Istati Membri kollha tal-UE, ħlief id-Danimarka, huma meħtieġa jadottaw l-ewro u jissieħbu fiż-żona tal-ewro, meta jkunu lesti biex jissodisfaw dawn il-kundizzjonijiet.
It-Trattat ma jispeċifikax skeda ta’ żmien partikolari biex pajjiż jissieħeb fiż-żona tal-ewro, iżda jħalli f’idejn l-Istati Membri biex jiżviluppaw l-istrateġiji tagħhom sabiex jissodisfaw il-kundizzjonijiet għall-adozzjoni tal-ewro.
Il-Kummissjoni Ewropea u l-Bank Ċentrali Ewropew flimkien jiddeċiedu jekk ġewx issodisfati l-kundizzjonijiet biex il-pajjiżi li jixtiequ jissieħbu fiż-żona tal-ewro jadottaw l-ewro. Wara li jivvalutaw il-progress li jkun sar fir-rigward tal-kriterji ta’ konverġenza, iż-żewġ korpi jippubblikaw il-konklużjonijiet tagħhom f’rapporti rispettivi. Imbagħad dawn jiġu ratifikati mill-Kunsill ECOFIN f’konsultazzjoni mal-Parlament u mal-Kapijiet ta’ Stat. Jekk favorevoli, jista’ jibda l-proċess tal-adozzjoni.