Ħarsa ġenerali
Belt kapitali: Amsterdam, il-Parlament u l-gvern jinsabu f’The Hague
Lingwa uffiċjali tal-UE: l-Olandiż
Stat Membru tal-UE: mill-1 ta’ Jannar 1958
Munita: Euro (€)
Żona tal-Euro: membru mill-1 ta’ Jannar 1999
Schengen: membru mis-26 ta’ Marzu 1995
Ċifri:
- Daqs ġeografiku: 37,391 km2
- Popolazzjoni: 18 044 027
(Sors: Eurostat - ċifri tal-2025 għad-daqs ġeografiku u l-popolazzjoni)
Sistema politika
In-Netherlands huma monarkija kostituzzjonali parlamentari. Il-Prim Ministru hu l-kap tal-gvern u l-monarka hu l-kap tal-istat. Kunsill tal-ministri għandu s-setgħa eżekuttiva.
Il-pajjiż hu maqsum fi 12-il provinċja u 342 muniċipalità. Hu maqsum ukoll f’21 distrett tal-ilma, kull distrett regolat b’bord eżekuttiv li għandu awtorità fi kwistjonijiet tal-ġestjoni tal-ilma. 6 pajjiżi u territorji extra-Ewropew fil-Karibew huma wkoll parti mir-Renju tan-Netherlands. Madankollu, dawn it-territorji mhumiex parti mill-UE.
Kummerċ u ekonomija
In-Netherlands jinsabu fit-tielet post fl-Unjoni Ewropea mil-lat ta’ PDG per capita b’€50 800, li hu ferm ogħla mill-medja tal-UE (€38 100). Dan jammonta għal 6.1% tal-PDG totali tal-UE.
(Sors: Eurostat - ċifri tal-2023 għall-PDG per capita u l-PDG)
(Sors: Eurostat - ċifri tal-2024 għall-esportazzjonijiet u l-importazzjonijiet)
Parlament Ewropew
Hemm 31 rappreżentant min-Netherlands fil-Parlament Ewropew. Skopri min huma dawn il-Membri tal-Parlament Ewropew u segwi l-attivitajiet tal-uffiċċju tal-Parlament Ewropew fin-Netherlands.
Kunsill tal-UE
Fil-Kunsill tal-UE, il-ministri nazzjonali jiltaqgħu b'mod regolari biex jadottaw il-liġijiet tal-UE u jikkoordinaw il-politiki. Rappreżentanti mill-gvern Olandiż jattendu l-laqgħat tal-Kunsill li jiffukaw fuq il-qasam ta’ responsabbiltà tagħhom diversi drabi fis-sena.
Il-presidenza tal-Kunsill tal-UE
Il-Kunsill tal-UE m’għandux president permanenti b’persuna waħda (bħall-Kummissjoni jew il-Parlament). Minflok, ix-xogħol jitmexxa mill-pajjiż li jkollu l-presidenza tal-Kunsill, li jinbidel kull 6 xhur.
Matul dawn is-6 xhur, il-ministri mill-gvern ta’ dak il-pajjiż jippresiedu u jgħinu biex jiddeterminaw l-aġenda tal-laqgħat tal-Kunsill fl-oqsma ta’ politika differenti, u jiffaċilitaw id-djalogu mal-istituzzjonijiet l-oħrajn tal-UE.
Dati tal-presidenzi Olandiżi:
Lul-Diċ 1960 | Lul-Diċ 1963 | Lul-Diċ 1966 | Lul-Diċ 1969 | Lul-Diċ 1972 | Lul-Diċ 1976 | Jan-Ġun 1981 | Jan-Ġun 1986 | Lul-Diċ 1991 | Jan-Ġun 1997 | Lul-Diċ 2004 | Jan-Ġun 2016 | Lul-Diċ 2029
Kummissjoni Ewropea
Il-Kummissarju Ewropew innominat min-Netherlands hu Wopke Hoekstra, li hu responsabbli għall-klima, l-emissjonijiet żero netti u t-tkabbir nadif.
Il-Kummissjoni hi rrappreżentata f’kull pajjiż tal-UE minn uffiċċju lokali, imsejjaħ “rappreżentanza”. Skopri aktar dwar ir-rappreżentanza tal-Kummissjoni fin-Netherlands.
Kumitat Ekonomiku u Soċjali Ewropew
In-Netherlands għandu 12-il rappreżentant fil-Kumitat Ekonomiku u Soċjali Ewropew. Dan il-korp konsultattiv – li jirrappreżenta lil dawk li jħaddmu, il-ħaddiema u gruppi oħrajn ta’ interess – hu kkonsultat dwar il-liġijiet proposti, biex ikun hemm idea aħjar tal-bidliet possibbli tas-sitwazzjonijiet soċjali u tax-xogħol fil-pajjiżi differenti.
Kumitat Ewropew tar-Reġjuni
In-Netherlands għandu 12-il rappreżentant fil-Kumitat Ewropew tar-Reġjuni, l-assemblea tal-UE tar-rappreżentanti reġjonali u lokali. Dan il-korp konsultattiv jiġi kkonsultat dwar il-liġijiet proposti, biex jiżgura li dawn il-liġijiet iqisu l-perspettiva minn kull reġjun tal-UE.
Rappreżentanza permanenti għall-UE
In-Netherlands jikkomunika ukoll mal-istituzzjonijiet tal-UE permezz tar-rappreżentanza permanenti tiegħu fi Brussell. Bħala l-“ambaxxata għall-UE” tan-Netherlands, il-kompitu ewlieni tagħha hu li tiżgura li l-interessi u l-politiki tal-pajjiż jinstemgħu u jiġu segwiti kemm jista’ jkun fl-UE.
Baġits u finanzjament
In-Netherlands kif se jibbenefikaw mill-baġit tal-UE?
Il-baġit tal-UE hu l-għodda li tiżgura li l-Ewropa tibqa’ forza demokratika, paċifika, prospera u kompetittiva . L-UE tużah biex tiffinanzja l-prijoritajiet tagħha u proġetti kbar li l-biċċa l-kbira tal-pajjiżi individwali tal-UE ma setgħux jiffinanzjaw waħedhom.
Il-benefiċċji tas-sħubija fl-UE jaqbżu b’mod sinifikanti d-daqs tal-kontribuzzjonijiet tal-baġit tal-UE u l-eżempji huma ħafna. L-Istati Membri kollha jibbenefikaw mill-fatt li huma parti mis-Suq Uniku, approċċ kondiviż għall-isfidi komuni tal-migrazzjoni, it-terroriżmu u t-tibdil fil-klima, u kisbiet konkreti bħal infrastruttura tat-trasport aħjar, servizzi pubbliċi modernizzati u diġitalizzati u trattament mediku mill-aktar avvanzat.
Kemm kull pajjiż tal-UE jħallas fil-baġit tal-UE jiġi kkalkulat b’mod ġust. Aktar ma tkun kbira l-ekonomija tal-pajjiż, aktar iħallas – u viċi versa.
Il-baġit tal-UE mhux dwar l-għoti u t-teħid – hu dwar il-kontribut kollettiv biex l-Ewropa u d-dinja jsiru post aħjar għalina lkoll.
Infiq u dħul tal-baġit tal-UE għal kull pajjiż u għal kull sena
Proġetti ffinanzjati mill-UE fin-Netherlands
Il-flus mill-baġit tal-UE jgħinu biex jiġu ffinanzjati programmi u proġetti fil-pajjiżi kollha tal-UE – pereżempju, biex jinbnew it-toroq, jiġu ssussidjati r-riċerkaturi u jitħares l-ambjent.
Skopri aktar dwar kif in-Netherlands jibbenefikaw mill-finanzjament tal-UE u mill-fondi ta’ rkupru f’pajjiżek jew fir-reġjun tiegħek.