Aċċess għall-informazzjoni

Trasparenza

It-trasparenza hija waħda mill-prinċipji ewlenin tal-UE, u tirrikjedi li l-UE tiżvela informazzjoni dwar it-tfassil tal-politika u l-infiq kif ukoll li tirrispetta l-prinċipju tal-libertà tal-informazzjoni. Dawn il-prinċipji huma stabbiliti fit-trattati tal-UE.

L-Artikolu 10 tat-Trattat dwar l-Unjoni Ewropea jistipula li d-deċiżjonijiet għandhom jittieħdu “b’mod kemm jista jkun ... qrib iċ-ċittadin”. L-Artikolu 11 jiddikjara li kemm l-individwi kif ukoll l-assoċjazzjonijiet rappreżentattivi għandhom jingħataw l-opportunità li “jgħarrfu u jiskambjaw pubblikament l-opinjonijiet tagħhom fl-oqsma ta' azzjoni kollha tal-Unjoni”.

It-Trattat dwar il-Funzjonament tal-Unjoni Ewropea ikompli jiftaħ fuq dawn il-punti. Jiddikjara li l-istituzzjonijiet tal-UE huma obbligati jaġixxu pubblikament u jiżguraw li l-individwi u kwalunkwe persuna fiżika jew ġuridika li tirrisjedi jew li jkollha l-uffiċċju reġistrat tagħha f’pajjiż tal-UE tkun tista’ taċċessa d-dokumenti (l-Artikolu 15).

F’termini prattiċi, dan ifisser li int intitolat li taċċessa dokumenti mill-istituzzjonijiet, il-korpi, u l-aġenziji tal-UE, inklużi testi leġiżlattivi, dokumenti uffiċjali, minuti tal-laqgħat, u aġendi. Uża l-links f’din il-paġna biex taċċessa l-bażijiet tad-data u r-reġistri pubbliċi tagħhom, fejn tista’ tikseb dokumenti direttament online jew titlobhom.

Aċċess għad-dokumenti

Biex tiżdied it-trasparenza, il-Kummissjoni Ewropea, il-Parlament Ewropew, il-Kunsill Ewropew, u l-Kunsill tal-UE jippubblikaw l-iskedi tal-laqgħat tagħhom minn qabel u jaqsmu informazzjoni dwar l-eżiti tagħhom fil-konferenzi stampa. Tista’ wkoll issegwi s-sessjonijiet tal-Parlament u partijiet mil-laqgħat tal-Kunsill online.

Il-prijoritajiet kollha tal-ipprogrammar, inklużi l-linji gwida politiċi tal-Kummissjoni, id-diskors dwar l-Istat tal-Unjoni, u l-programm ta’ ħidma tal-Kummissjoni, isiru pubbliċi. L-aġenda strateġika tal-Kunsill Ewropew u l-prijoritajiet sussegwenti tal-presidenza tal-Kunsill isiru pubbliċi wkoll.

Tista’ tara l-iskedi tal-Kummissarji, tal-President tal-Kunsill Ewropew, u tal-President tal-Parlament Ewropew.

Anki l-istituzzjonijiet u l-korpi l-oħrajn tal-UE jippubblikaw l-iskedi tal-presidenti tagħhom, il-kalendarji tal-laqgħat, u l-laqgħat li jixxandru fuq l-internet.

Għal aktar informazzjoni, irreferi għall-istituzzjonijiet u għall-korpi.

Bażijiet tad-data tal-UE

EUR-Lex

Il-EUR-Lex huwa l-bieb li jagħtik aċċess għal-Liġi tal-UE. Tista’ tfittex trattati, atti legali, ftehimiet internazzjonali, proċeduri tat-tfassil tal-liġijiet, sommarji tal-leġiżlazzjoni tal-UE, u każistika.

Ir-reġistru tat-trasparenza

Fittex organizzazzjonijiet jew irreġistra tiegħek stess. Ir-reġistru jinkludi informazzjoni dwar l-interessi li qed jiġu segwiti, minn min u b’liema baġits fil-livell tal-UE. Jitmexxa kemm mill-Parlament Ewropew kif ukoll mill-Kummissjoni Ewropea. Innota li r-rappreżentanti ta' organizzazzjoni ma jistax ikollhom laqgħat ta’ livell għoli mal-Kummissarji jew ma’ uffiċjali għolja tal-Kummissjoni jekk l-organizzazzjoni tagħhom ma tkunx reġistrata.

DORIE

Fittex fil-bażi tad-data DORIE għal dokumenti dwar kwistjonijiet tal-UE mill-1946 sal-lum. Dawn jinkludu strumenti legali adottati mill-Istituzzjonijiet, minuti tal-laqgħat miżmuma mill-istituzzjonijiet u mill-korpi Ewropej, stqarrijiet għall-istampa, artikli tal-gazzetta, diskorsi tal-mexxejja Ewropej, u noti interni tal-Kummissjoni.

Pubblikazzjonijiet tal-UE

Ir-rapport ġenerali dwar l-attivitajiet tal-Unjoni Ewropea

Dan ir-rapport jagħti rendikont tal-inizjattivi u l-kisbiet ewlenin tal-UE tul is-sena li għaddiet.

L-Uffiċċju tal-Pubblikazzjonijiet tal-UE

Fittex fil-librerija online tal-pubblikazzjonijiet mill-istituzzjonijiet u l-korpi l-oħrajn tal-UE.

Il-Portal tad-Data Miftuħa tal-UE

Fittex fil-Portal tad-Data Miftuħa tal-UE, punt ta’ aċċess uniku għad-data mill-istituzzjonijiet tal-UE u korpi oħrajn. Tista’ tuża u terġa' tuża din id-data għal finijiet kummerċjali jew mhux kummerċjali.

Reġistri pubbliċi